Space of Ottar

Kalde novemberdagar og netter har vorte sjeldnare. Få stader på Sunnmøre har lange måleseriar som viser minimumstemperaturar. I Tafjord går denne måleserien attende til 1954. Det gir ei rekke på 54 år å sjå på, frå 1954 til 2007. Dei første 40 åra brukte det å vere i middel to døgn kvar novembermånad då temperaturen gjekk ned til -5,0 grader eller kaldare. Særleg på 1960- og 70-talet hende dette ofte. Dei siste ti åra har kulde vorte sjeldnare. Når statistikken syner at det har hendt ein halv gong per månad og år tyder det at dei fleste åra no går utan at novembertemperaturen nokon gong kjem ned i fem kuldegrader.

Tafjordbygda er ikkje av dei stader som utmerker seg med kulde, trass i at ho ligg i indre strok. At det no sjeldnare kjem kulde i november heng mest saman med eit mildare klima, men tilveksten av skog jamnar ut temperaturen lokalt og dempar kuldebolkane.

Den fritt tilgjengelege databasen til Meteorologisk Institutt er grei å bruke når ein vil ha svar på spørsmål om korleis vêret har vore i distriktet. November er ein av dei fire nedbørrike månadane på slutten av året. Målingar i Ørskog og Volda i om lag femti år viser begge stader at nedbøren er størst i byrjinga av månaden og litt mindre seinare. Truleg har det vore større flaumar (det er helst då, og ikkje når det er kaldt, at nedbøren er størst) tidleg i november. Men det er slik at når det har vore mykje nedbør ein gong så er sjansen større for at det skal kome mykje nedbør ei veke seinare. Og to døgn på kort tid med ekstra mykje nedbør er nok til å gjere utslag på statistikkar som tek med 1500 dagar (50 år x 30 døgn). Og om det same på slump har hendt i fleire av desse åra vert utslaga i statistikken tydelege. Så når ein veit at desember brukar å vere like nedbørrik som november bør ein ikkje vente anna enn at sjansen for nedbør truleg er like stor i siste halvdel av november.