Space of Ottar

På Grønning i Valldalen har det vore målt snødjupner frå 1973. Denne plassen ligg så høgt og så langt frå sjøen at snøen samlar seg opp. Gjennomsnittet for 36 år viser at tidleg i januar har snødjupna i middel vore kring 55 cm, og i slutten av månaden kring 70 cm.

Eit gjennomsnitt som dette, utrekna for eit klima som endrar seg, seier litt. Men korleis er det for dei ulike tiåara? Naturlegvis var det meir snø før, sjølv om minkinga i snømengd har vore mindre dramatisk enn i eit mildare klima ute ved kysten. Det var på slutten av 1980-talet og ut gjennom heile 1990-talet at det jamnt over var minst snø på Grønning i januar. Sidan har det vore bort i mot ei normalisering med omsyn til snømengd.

Januar er ikkje lengre slik månaden brukte å vere. Det er sjeldan mykje snø i låglandet. I Ørskog har det vore observert vêr og m.a. snødjupner sidan 1957. Fram til 1970 brukte snødjupna i middel å ligge rundt 30 cm. Så kom det nokre snøfattige vintrar, deretter ein periode frå midt på 1970-talet til langt ut i 1980-åra då det igjen var snødjupner nesten som i 1960-åra. Siste tjue åra har snødjupna i middel vore i overkant av 10 cm.

På Sunnmøre har vi vore vane med at snøen kjem og reiser att i låglandet gjennom vinteren. Ein må opp i høgda for å finne stader der snøen samlar seg opp og veks ut gjennom januar. Før var det også slik i snørike bygder i låglandet. Statistikken for Ørskog gjennom 52 år viser at i middel har snødjupna vore omlag den same både tidleg og seint i januar. Desse tala seier ikkje noko om kva slags snø det har vore. Kan hende har det vore meir kompakt snø i slutten av januar.