August er ein månad med moderat normalnedbør samanlikna med tida september -januar. Og ikkje er den totale nedbørmengda så variabel som i februar-mars, som sume år er svært turre og andre år har mykje nedbør. Men døgnnedbøren kan vere svært stor i august.
Medan dei store nedbørmengdene om hausten og vinteren helst kjem i sørvestleg vêr har store nedbørmengder og flaum i august oftast kjeme i vestleg og nordleg vêr. Om sommaren er lufta over land varm og inneheld ofte rikeleg fukt. Det som då skal til er kjøligare luft frå havet som løftar denne opp. Havlufta er også rimeleg varm om sommaren, og inneheld rikeleg fukt. Denne lufta vert også pressa opp over fjella fordi vind frå vest og nord er pålandsvind. Styrken på vinden i desse tilfella har vore kring liten kuling, stiv kuling om det var sist i månaden. Her brukar eg observasjonar på Svinøya for å vurdere vinden si retning og styrke.
Mine eigne målingar viste 64 mm regn på eit døgn midt i denne månaden, og det er mykje. Nokre døgn etterpå hadde Ålesund langt meir regn, og det er sjeldent mykje.
Har sett på observasjonar som er gjorde på Sunnmøre i over femti år. Det viser seg at flaumane kjem når vinden kjem frå sektoren frå sørvest til nord-nordaust. Seks tilfelle med mykje nedbør peikar seg ekstra ut.
13. august 1962 vart det målt 75 mm regn i Ørsta. Skodje hadde nesten like mykje. Døgnet før hadde vinden dreia frå sør til vest, med temperaturfall og tjukk nysnø i fjelltoppane.
31. august 1964 vart det målt 87 mm regn i Ørsta og nesten like mykje på Linge. Dette døgnet vart det målt mykje nedbør på mange målestasjonar både i midtre og indre strok.
22. og 23. august 1980 vart det målt mykje regn på ein del av målestasjonane i midtre strok. Regnet den 22. ga Barstadvik, Nordre Vartdal og Vartdal den største flaumen i det 20. hundreåret. Vind frå nord-nordvest førte til at medan det regna moderat langs Vartdalsstranda kom det store mengder ei halv mil lengre inne. Flaumen var størst om morgonen, og dei store nedbørmengdene vart fordelte på to døgn. Ørsta hadde 76 + 68 mm, og Fiskå 111,5 + 55,5 mm.
2. august 1989 vart det målt 75 mm regn på Brandal i nordavêr. Kanskje var nedbøren størst i midtre og sume stader i ytre strok?
7. og 8. august 2000 vart det målt mykje regn på Overøye i Stordalen. 55,4 + 78,3 mm på to døgn. Det siste døgnet bles det rundt vestleg heile tida.
15. og 16. august 2003 kom det mykje regn i midtre og indre strok. Vinden kom frå nord eller nord-nordvest. På Ekset i Volda kom det 102,3 mm den 15. Denne staden brukar sjeldan å utmerke seg med mykje nedbør.
Space of Ottar 