Space of Ottar

Overskya, vestleg drag, skodde over 500 moh. Regnbyer. Regnet kom i går seint på ettermiddagen. Til kl 20 kom 13,6 mm, til kl 8 i dag var det kome 28,0 mm. Til dels hagl i går kveld. No er det flau vind og +6 grader. Snøen har trekt seg litt opp og ligg ned til 600 moh. Lauvskogen er gul over 200 moh, gulgrøn nedanfor.

Nysnø ned til 500 moh. 4,1 mm regn i natt. Nedbøren, som starta seint om kvelden, ser ut til å ha kome som byer. Siste bya til no kom tidleg om morgonen.  Men enno finst det byeskyer omkring på den elles skya eller overskya himmelen. Toppane og elles fritt for skodde. +5 grader og lett bris på føremiddagen.

Regnbyer i natt. Det kom 6,0 mm. Nysnø ned til 700 moh. I dag er det opplett og skya. Rukleskyer og fjørskyer som driv frå sør-søraust. Skodde på nokre toppar, men dei høgaste er skoddefrie. +7 grader før middag. Svak vind.

Lett overskya i dag. Lagskyer som har slept ei utydeleg sol i gjennom. Flau vind. +8 grader om kvelden. Turt på vegane og etter kvart også i graset.

Heile gårsdagen var fin, med delvis skya, berre høge skyer, fjørskyer og rukleskyer, og ein god del sol, i det minste bleik sol gjennom skyer.

I dag var det turt og overskya i starten. +3 grader. På sume fjell var det skodde. Det kom ei regnbye om morgonen, 0,2 mm, sidan har det vore skya opplett. Flau vind. Skyene kjem frå nordaust.

Enda ein dag med lettskya eller delvis skya og berre høge skyer, fjørskyer og rukleskyer. Solskin, mest bleik sol gjennom skyer. Svak vind. Graset er vått lenge trass i vinden. Mest rukleskyer innover land. Linseform på desse, så det bles i høgda. +3 grader tidleg i dag. Dagtemperaturen nærmar seg ti grader.

Litt sol, og halve himmelen dekt av rukleskyer eller lavare skyer. Nokre har diffus mandelform som vitnar om vind i høgda. Austleg drag i skyene. Også ein del fjørskyer siste døgnet. +10 grader kl 12. Svak vind.

Såg ein del rukleskyer av typen fåreskyer i går ettermiddag. Desse markerte heller slutten på eit lågtrykk enn varsel om eit nytt.

9,4 mm regn siste døgn. Spreidde regnbyer i går og i natt.

I dag er det skya, +11 grader, gløtt av sol, svak vind og sørvestleg drag i både lave og høgare skyer. Bukleskyer dekker over halve himmelen, og rukleskyer ligg bakom og dekker noko av resten.

Eit typisk lågtrykk som ikkje er kome for langt i utviklinga er omgitt av relativt kald luft i havnivå unnateke ein sektor sør for senteret. Dette er varmsektoren. Aust for varmsektoren ligg varmfronten, og vestafor ligg kaldfronten. Nedbøren i lågtrykket er knytt til frontane. Passerer lågtrykkssenteret nordafor observatøren kjem nedbøren i to omgangar. Først den jamne og langvarige nedbøren i varmfronten, så nedbøren i kaldfronten. Denne kjem på kortare tid, og gjerne som byer som kjem så tett at det ikkje er heilt opplett mellom.

Der er også nedbør andre stader i lågtrykket. Denne er knytt til temperaturkontrastar mellom lufta og underlaget. Bakom (vestafor) kaldfronten er lufta kaldare enn underlaget. Dette gir ustabil luft og byer. Desse byene er små i horisontal utstrekning og med god avstand i mellom. Det vert kortvarige og gjerne intense byer, og lengre perioder med opplett. I varmsektoren er lufta stabil, noko som kan gi skoddeskyer og yr.

Denne framstillinga gir eit bra inntrykk av eit lågtrykk over flatt underlag, spesielt over hav. Land kompliserer fordi temperaturen i underlaget endrar seg fort og fordi lufta ikkje så lett bles vekk. Fjell kompliserer vêret i lågtrykket mykje.

I det siste lågtrykket kom det ikkje regn der varmfronten "skulle vere". Når lufta over land var så varm som ho var tidleg i veka kan ein undre seg over om varmlufta som kjem sønnafor lågtrykket i det heile kjem med stigande temperatur og kontrastar. I så fall vert det lite att av varmfronten. Og nordafor Stad gir ikkje dei sørlege eller sørvestlege vindane i varmfronten mykje heving mot fjella. Er vinden sørleg vert det tvert i mot fallande luft og oppløysing av nedbør.

Kaldfronten ga derimot skikkeleg temperaturkontrast. Det har vorte åtte grader kaldare. Vestavinden vert pressa opp av fjella. 24 timar etter at kaldfronten kom kjem nedbørmengda til å overstige 40 mm.

 

Spreidde haglbyer, for det meste svak vind, og +5 grader om morgonen. Skya, vestleg drag. 38,5 mm nedbør siste døgn.

Midt på dag i går kom kaldfronten med kraftig regn. Halvparten av regnet siste døgn kom på 3-4 timar. Sidan har regnet kome i korte intense byer.