Space of Ottar

Overskya, eit dekke av lagskyer, aust lett eller laber bris, +12. Det har kome 3 1/2 mm regn siste døgn, alt dette kom tidleg på dagen i går i form av regnbyer. Elles var det ein del sol innimellom i går.

Siste døgn 12 1/2 mm regn. Av dette 1 mm på eit halvt døgn i går, resten i natt, truleg som byer. Greit at det regnar mest om natta. Men no held regnbyene fram ut over føremiddagen. Det var + 6 1/2 grad kl. 7, ned til + 41/2 grad i natt. Då har det kome meir snø i fjella. Elles er det flau vind, overskya, og ein god del lave skoddeskyer.

+10 1/2, skya, vestleg drag, berre skyer over fjelltoppane, flau vind.

I dag for det meste opplett og skya, gløtt av sol sume tider, spreidde regnbyer. I går kveld og i natt regna det mykje. 41 mm på eit døgn, derav 10 mm på første tolv timane, og av dette igjen det meste på ettermiddagen/kvelden. Så kom det 31 mm på tolv timar i natt. Vestavêret gir mykje nedbør i Vaksvika, og truleg aukar nedbøren opp etter dalen. Bygder lengre vest, som Volda og Vartdalsstranda, har langt mindre nedbør i vestleg vêr. Ein titt på voldaveiret.no stadfesta det denne gongen. Vestavinden set nedbøren langt inn over land, og på Sunnmøre er det ikkje langt inn til dei inste fjordane.

Regn, +9, overskya, svak vind, skoddeskyer over fjorden ned til 50 moh. Elles skoddedottar i ulike høgder, og skodde på høgaste fjelltoppane. 2 mm regn sidan i går.

+12 grader, flau vind, overskya, opplett, turt, regn nokre mil lengre vest. Fjella skoddefrie.

I dag har det vore for det meste skya, litt sol midt på dag, av og til nokre dropar. 1 mm i målebegeret etter at det regna av og til i går kveld.

I dag overskya med ei bleik sol som skin gjennom. Ser ut til at eit dekke av lagskyer ligg over haugskyer. +16, svak vind. Om morgonen var det +9, skya med både fjørskyer, rukleskyer, bukleskyer og skoddeskyer. I går var det delvis skya eller skya med haugskyer på himmelen. Om kvelden skya med bukleskyer.

I dag overskya. Skoddeskyer dekker mykje av himmelen, og tjukkast ut over fjorden. Underkant på minst 250 moh. +9 grader, svak vind, turt.

 

I går var vêret fint, og finast i ytre og midtre strok. Mykje sol. Mykje haugskyer inn over land, og spreidde regnbyer i indre strok. Turt i mitt måleglas. Temperaturen var +18 kl. 17.

Dagen før var der store haugskyer om føremiddagen, og det regna ei stund om dagen. Bløytte underlaget, men ikkje stort meir. Det som eventuelt kom i mitt måleglas rakk å turke opp, for eg kontrollerte ikkje mengda før eit døgn etterpå. Torsdag kvelden dreia vinden nordaust og det letta til delvis skya eller lettskya.

For det meste skya siste dagane. Spreidde byer i går. Her traff ikkje nokon av byene skikkeleg, det kom 0,1 mm i ei regnbye på ettermiddagen. Om kvelden vart det lettare, og i natt har vêret vore fint.

No er det +10, flau vind, skya, haugskyer og litt fjørskyer. Ein god del låge skyer har kome inn. Desse ligg med underkant på 700 moh. Nokre tårnar seg opp, andre er så små at fjelltoppane stikk oppom. Skyene flyttar seg sakte frå vest. Lufttrykket endrar seg lite.