Har sett tilbake på nedbørstatistikkar for oktober, og ser denne gongen nærare på tilhøva i slutten av månaden. Dei fleste gongane det har kome mykje nedbør seint i oktober har vinden vore rundt sørvestleg, nokre gongar nærare sørleg, andre gongar nærare vestleg. Desse vindretningane gir mest nedbør sørvest på Sunnmøre, men vest-sørvestleg vind ser ut til å ha gitt aller mest nedbør på målestasjonane på Overøye, og på Velle i Ørsta. Overøye ligg høgt, men terrenget rundt ligg også høgt. Så det kan nok seiast at Overøye er eit lavt punkt mellom fjella og ikkje gir unaturleg høge nedbørtal samanlikna med stasjonar i låglandet.
Ei vidare dreiing av vinden mot nordvestleg gir mest nedbør på indre strok. Eit eksempel på dette frå den tida det vart målt nedbør på Linge viser at ved vest-nordvestleg eller nordvestleg vind fekk denne staden aller mest nedbør av målestasjonane på Sunnmøre. Det siste eksemplet med mykje nedbør i slutten av oktober er eit døgn med moderat vindstyrke frå nord eller nord-nordaust. Då var det Fiskå som målte mest nedbør, kanskje grunna at vinden var ikkje sterk nok til å drive nedbøren lengre inn.